Azərbaycanı kəşf etmək üçün avtomobildə səyahət: payız mövsümündə gəzməli-görməli yerlər

Getmək Azərbaycanı kəşf etmək üçün avtomobildə səyahət: payız mövsümündə gəzməli-görməli yerlər

Payız Azərbaycanda ilin gözəl mövsümüdür – ilin bu çağında ölkənin təbiət mənzərələri qırmızı, narıncı və qızılı çalarlarla alışıb-yanır. Payız sərin və təmiz havada avtomobil səyahəti üçün ideal vaxtdır! Siz bu gözəl ölkənin bir-birindən maraqlı bölgələri üzrə səyahətdən həqiqətən zövq alacaqsınız.

Bu bələdçidə biz payız mövsümündə avtomobil icarəyə götürərək səyahətə çıxmaq üçün Azərbaycanın gəzməli-görməli yerlərinin siyahısını hazırlamışıq.

1.  Quba: Azərbaycanın alma paytaxtı

Səyahətinizə Bakıda başlayaraq, şimala doğru - Azərbaycanın “Alma paytaxtı” (Variant 2. “Alma bağı”) adlandırılan Quba şəhərinə yola düşün. Marşrut boyu siz alma və üzüm bağları ilə zəngin olan mənzərəli kənd yerlərindən keçəcəksiniz. Qubada isə sizi təmiz dağ havası, Təngəaltı dağ kanyonunun (Təngə dərəsinin) füsunkar gözəlliyi və yerli almaların misilsiz dadı gözləyir!

2.  Şəki: möhtəşəm payız mövsümündə tarixi inci

Şəkiyə getmək üçün qərbə doğru yola düşün. Bu tarixi şəhər Böyük Qafqaz dağları ilə əhatə olunub. Şəhərin arxitektur gözəlliyi rəngarəng payız bitkiləri arasında sanki bərq vurur. Şəkidə Xan sarayına mütləq baş çəkin və ləzzətli Şəki paxlavasının dadına baxmağı unutmayın!

3.  Qəbələ: Təbiətin şıltaq oyunu

Avtomobili Şəkidən birbaşa Qəbələyə sürərək maraqlı səyahət edin. Buradakı dağ yollarından gur şəlalə və çayların, eləcə də sıx meşələrin heyrətamiz mənzərəsini seyr edə biləcəksiniz. Qəbələ açıq hava həvəskarları üçün əsl cənnətdir: burada payızın möhtəşəm mənzərəsi fonunda at sürmək, ziplayn (kanat yolu) və piyada yürüş üçün unikal imkanlar var.

4.  Lahıc: sənətkarlar kəndi

Mis sənətkarlığı ilə məşhur olan qədim Lahıc kəndinə doğru səyahət edin. Burada siz müxtəlif bitki örtüyünün heyrətamiz mənzərəsini göstərən dolanbac dağ yolları ilə getməli olacaqsınız. Bununla yanaşı, sizi kəndin daş döşənmiş küçələri və öz əl işlərini sərgiləyən sənətkarlar gözləyir!

5.  Göygöl Milli Parkı: təbiət möcüzələri diyarı

Cənuba doğru irəliləyərək, payız yarpaqlarının rəngarəng qobelenə çevrildiyi Göygöl Milli Parkına səyahət edin. Parkın ərazisində ətrafı meşə və cığırlar ilə əhatə olunmuş Göygöl gölü sizi heyran edəcək. Bura piknik və digər açıq hava istirahəti üçün ideal yerdir!

Payız mövsümündə Azərbaycan üzrə avto-səyahət üçün məsləhətlər

• Avtomobil icarə edin: Tətilinizdən tam zövq almaq üçün avtomobil icarəsini nəzərdən keçirin. Avtomobilin icarəsi üçün “Avis” kimi yerli və ya tanınmış beynəlxalq şirkətlərə müraciət edin. 
• Yolların vəziyyəti: Magistral yolların (şoselərin) əksəriyyəti yaxşı vəziyyətdə olsa da, bəzi ucqar ərazilərin yollarında qüsurlar ola bilər. Hər hansı səyahət planından əvvəl, yolların vəziyyəti barədə məlumat əldə edin.
• Səyahət sığortası: Səyahət zamanı can rahatlığı üçün sığortanızın icarəyə götürdüyünüz avtomobili də ehtiva etməsindən əmin olun.
• Payıza hazırlıq: Dağlarda aşağı hava temperaturuna hazırlıqlı olun. Xüsusən də axşam saatlarında və yüksək hündürlükdə isti geyinməyi unutmayın.
• Yerli mətbəx: Yol kənarındakı restoranlarda Azərbaycan mətbəxindən təam etmək fürsətini qaçırmayın və dolma və ya plov kimi yerli yeməklərin dadına baxın!

Payız mövsümündə Azərbaycanın bir-birindən gözəl bölgələri üzrə səyahətə çıxmaq heyrətamiz mənzərə, mədəni müxtəliflik və yerli əhalinin mehribanlığı sayəsində əsl zövqə çevrilir! Avtomobil icarəyə götürərək yola çıxın və ilin bu sehrli vaxtında Azərbaycanın füsunkar gözəlliyindən həzz alın!